بڕیاردرا عه‌ره‌به‌ كۆچبه‌ره‌ هاتووه‌كان له‌سه‌رژمێریدا به‌كه‌ركوكی ئه‌ژمارنه‌كرێن

رۆژی 27/7  عه‌بدولڕه‌حمان مسته‌فا پارێزگاری كه‌ركوك سه‌رپه‌رشتی كۆبونه‌وه‌یه‌كی لیژنه‌ی ئاماری كه‌ركوكی كرد.
له‌كۆبوونه‌وه‌كه‌دا به‌ڕێوه‌به‌ری ئاماری كه‌ركوك تیشكی خسته‌سه‌ر چالاكییه‌كانی تیمه‌ مه‌یدانییه‌كانی پرۆسه‌ی نوێكردنه‌وه‌ی گه‌مارۆدان و ژماره‌لێدانی  خانووبه‌ره‌و خێزانه‌كان كه‌ له‌ (18) ی ئه‌م مانگه‌وه‌ له‌پارێزگای كه‌ركوك ده‌ستیپێكردووه‌و وتی: تائێستا 86% ی كاره‌كانمان ته‌واوكردووه‌و له‌ماوه‌ی چه‌ند رۆژی داهاتوودا پرۆسه‌كه‌ به‌ ته‌واوی جێبه‌جێ ده‌كرێت.

رونیشكرده‌وه‌ كه‌پسپۆڕان و شاره‌زایانی  نه‌ته‌وه‌ یه‌كگرتوكان له‌بواری  ئامارو سه‌رژمێری دانیشتوان دێنه‌ كه‌ركوك.
عه‌بدولڕه‌حمان مسته‌فا ته‌ئكیدیكرده‌وه‌ كه‌ بۆ  سه‌رخستنی پرۆسه‌ی سه‌رژمێری له‌كه‌ركوك  پێویسته‌ دیداره‌كان به‌رده‌وام بن و چڕبكرێنه‌وه‌ و كۆبونه‌وه‌ی ده‌وریی بكرێت.
وتیشی:  نامانه‌وێت هیچ كه‌موكوڕییه‌ك له‌پرۆسه‌كه‌ به‌دیبكرێت و پێویسته‌  هه‌ماهه‌نگی  و هاوكاری نێوان هه‌موان هه‌بێت له‌پێناوی سه‌رخستنی پرۆسه‌ی  سه‌رژمێری چونكه‌ له‌ڕێگه‌ی پرۆسه‌ی سه‌رژمێرییه‌وه‌ پلانی ئاینده‌ داده‌نرێت.
سه‌باره‌ت به‌ مه‌سه‌له‌ی  ئاواره‌و كۆچبه‌رانیش، له‌لێدوانێكی تایبه‌تدا عه‌بدولڕه‌حمان مسته‌فا پارێزگاری كه‌ركوك پێی راگه‌یاندین: پێویسته‌ مامه‌ڵه‌ی ورد له‌ گه‌ڵ مه‌سه‌له‌ی عه‌ره‌به‌ كۆچبه‌ره‌ هاتووه‌كان بۆ كه‌ركوك  بكرێت و له‌ڕووی تۆماركردنه‌وه‌ به‌دانیشتوانی ره‌سه‌نی كه‌ركوك حساب نه‌كرێن.
وتیشی: ئه‌و خه‌ڵكانه‌ی له‌ناوچه‌كانی تری عیراقه‌وه‌ به‌ناوی كۆچبه‌رییه‌وه‌ روویانكردووه‌ته‌ شاری كه‌ركوك وه‌كو دانیشتووی كه‌ركوك تۆمارناكرێن ئه‌گه‌ر ناویشیان له‌لیسته‌كاندا تۆماربكرێت.

Le kirkukcenter wergirawe